خالتي خضراء ماتفهمش بالسوري 
..سنين باش ولات تنطق Eco Gad كيما يلزم ..كيما ماتعرفش الفلاش باك ( flash back ) 
أما تتفكر ..
والفلاش باك عند خالتي خضراء اسمو إييييييييه ..ياحسرة .. 
وكيما في الأفلام كي تطول المدة عاللي يخرّف ..نشوفو الدنيا noir et blanc …أما مزيانة ..
حكات خالتي خضراء للنساء الحال شتاء 
وهوم ملمومين على شقالة المقرونة فل ..على فيض المثنان 
والنهار اللي بدل حياتها 
..تتفكر سطاش انسنا التالي تقول البارح.. نهارة اللي جاها راجلها عم النوري وهي في *النوالة تحمش في العافية ..تطيب في كسيرات قمح معجونين بالمحبة والعرق ..
قعد عم النوري على طمبوري (tabouret) 
لوح قصير صانعو بيدو مقابل خالتي خضراء وقاللها : واشنهي رايك نرحلو نسكنو في تونس ؟ 
قلبت خالتي خضراء الكسيرة ومصت صويبعاتها من سخانة الغناي وقالتلو : لا لا سيدي ..مانخليش برّي ..مانخلّيش بلادي ونمشي نعمر بلاد الناس ..اشبينا هانا لاباس علينا واش يخصنا ؟
تبسم عم النوري وقاللها : هيا مالة هاضاكهو ..عالضالين آمين ..الجمعة الجاية نرحلو ..(عم النوري راجل ديمقراطي ويحترم الرأي والرأي الآخر ديم يتفرج في الجزيرة) 
قاتلو خالتي خضراء : ومعزاتي 
ودجاجاتي 
لمن نخليهم ؟ نهزهم معاي ؟
ضحك عم النوري حتى بان ناب الفضة 
وقاللها : يرّه ..وين نهزوهم ..حتى نلقو وين نسكنو باش نهزوهم معانا ..الحاصل هاسيدي سي عبد القادر ماك تعرفيه ..هو اللي باش يسكنا ويخدمنا معاه في الشركة متاعو ..قالي نحب نخدم مع بناي عمي نعرفهم ويعرفوني ..
خالتي خضراء : يخدمنا ؟ حتى نا تنخدم ؟ 
عم النوري : هلا واشي ؟ نتخادمو الزوز نتعاونو على هم الزمان ..
الحاصيلو ..جلب عم النوري المعزات باعهم نهار السوق وفرقت خالتي خضراء الدجاجات على جيرانها وخلت السردوك ..ليلة اللي ماشين طيبت عليه مقرونة جارية فل نومرو اثنين .. اييييه لتو مطعمها بين سنوني .. 
ونهارة اللي رحلنا ..راكبين في الباشي من تالي نبيبو على فيض المثنان ..كل مالكرهبة تبعد هي تصغار ..حتى اتقت وراء الكدية واتقى معاها صغري ..و كي جيت لتونس تحلت عيوني عالدنيا …وتجدد صغري ..
خزرت ليامنة لخالتي خضراء وقالتلها :
ليامنة : والكلبة ؟ 
خالتي خضراء : هي هي وجبناها معانا لتونس قلنا نصيبوها تعس عالشركة ..ماندريش ..ثرنتو في تونس الكاميراوات هي التعس بلا نبيح ..وفي تونس تبدل عليها الهواء ماعادش تنبح ..كان نبحت راهي مرتين في النهار قبل الماكلة ..تقول دواء ..
حدة : ووين سكنتو في تونس اخيتي ؟
ليامنة : كرو duplex في اللاك مقابل سفارة الارجنتين ..
يضحكو البنات وتكمل خالتي خضراء ..
خالتي خضراء : سكنّا سي عبد القادر في دار الشركة لبين مادبرنا دويرة ..ودبر للراجل الخديمة عند القاوري ..هلا ماو عندو فتق مايحملش الوقفة ..وشرانا تلفزة بالكولير وفريجيداي ..
كملت خالتي خضراء حديثها وخزرت لشقالة المقرونة باش تكمل تفطر لقاتها مغسولة وصويحباتها يشربو في التاي ..
ليامنة : آه ..مقرونة في حقها ..اما بربي يزينا منها ..كل يوم مقرونة فل..غدوة مثلا نعملو مقرونة جارية أما ببوش .. ..انّوعو شوي يارسول الله..
هوم هكاكة ويدخل شهاب في يدو امبوبة وtournevis americain 
: هيا لبنات كان كملتو فطوركم … سي عبد القادر قالي لم الناس الكل عندي مانقلهم ..
المرة الجاية نحكيولكم على علياء وفاتن وشهاب ومحمـد وانيس وفؤاد وخليل شيفور ال chariot ..علاش لمهم سي عبد القادر واش باش يقلهم؟ 
…خضراء يديها خضراء وفي Eco Gad تصنع في الخضار ..
هيا اقعدو بالسلامة ..