خالتي خضراء 
اللي يديها خضراء وقلبها فص اخضر مليان سبول ونوار … والقلب كيف الأرض …مالازموش يكون مصب…خاطر اللي يتطيش فيه يقتل الحياة وصعيب يعاود يترسكل 
..يدّوّر إلا بعرق كبير ..
( النفايات شر ..نصيب الشيطان في القلب وفي الأرض 
) حسب قول الراهب الداغستاني المسلم ضبة بن إد بن شرحبيل حمزاتوف ..الملقب بالشندقرلي …
وهذاكة علاش احنا في EcoGad خدمتنا بالضبط هي إعادة إعمار الأرض .. 
خالتي خضراء وحدة من صانعات الحياة ..وكيف تقلها هكة تقلك اللطف علي 
..انا مانعرف مالصانعات كان صانعات الكافيشانطة 
…كان يخرفلي عليهم سي النوري كي يتفكر ايامات صغرو في تونس ..
اليوم بعد الفطور وهي تلم في الماعون تحط فيه في القفة سألت روحها وصويحباتها ..
زعمة علاش باش يلمنا سي قدور ؟ 
تلفتت فتحية واقفة تقفل في بلوزتهاالخضراء وقالت : على ماضحكنا اليوم انشاء الله ربي يقدر الخير …
قالت حدة : هيه والله بالمجد ..يعطينا خير ها الضحكة ..
خالتي خضراء …قرات جمعة عند المدب حتى الفاتحة ماكملتش حفظتها 
…مرة بنتها الكبيرة حبت تحفظها سورة وإلا اثنين للصلاة قالتلها سيبي علي ..ربي يعرفني ونا نعرف ربي ..يحبني كان قريت وإلا ماقريتش ..ويقبل مني اللي نقول خاطر يعرف قلبي واش فيه ..
نهار تسمع في ولدها يحفظ ويعاود في قصيدة ل ( ابو نواس ) قالتلو عيب عليك وليدي تتحكحك عالولية ..راهو يطيح فيك ..شاي الله سيدي بونواس ..
خالتي خضراء لا تعرف سبينوزا ولا نيتشه ولا ابن خلدون اما الدنيا علمتها الحكمة ..حكمة العرق البارد وصقع بر فيض المثنان 
في دجنبر الأصم 
وخطوط يديها المحفورة بالوجيعة وهي تحطب وإلا تقلع في الحلفاء في عز التعب ..
عاد قالت على طبيعتها مزينة كلامها بتبسيمة ..واشي ..ياخي لازم كل مانضحكو نتشغبو ..اشبيه الكدر في طبيعتنا؟ 
..اضحكو ، دار الخلاء تبيع اللفت ..
نقزت اليامنة من قاع الفستيار وهي مزالت تخلل في سنيها ..
اليامنة : بالله من غير محقرانية نحب نفهم علاش اللفت بالذات ..اشبيها الخضرة لخرى ..دونية ..
ضحكو وخرجو زوز زوز تقول في صف المكتب ..
الحاصيلو تلمو رجال ونساء يستناو في سي قدور 
..البعض قال لازم باش يزيدنا في الشهرية ..الاخر قال اكيد باش يحكينا على خدمة سيدي رمضان ..قالك الخدمة في سيدي رمضان اجرها عند ربي دوبل ..
اليامنة : أنا من صباح ربي وكفوفي ياكلو في …باز زيادة في الشهرية..
هوم هكاكة يوتوتو …..كل واحد يدقز حتى خلط سي قدور ..
اليامنة : هاضكهو ..مادامو متبسم ولابس صباطو الأصفر امورنا في الجبن ..
سي قدور : هيا العينكم …كيفنكم لاباس ؟
الناس الكل في جوقة وحدة : الحمد لله ..
سي قدور : اليوم ..أولا حبيت نلمكم نسأل عليكم وعلى أموركم ..
فؤاد : ( يوشوش لشهاب ) يظهرلي مريقل صاحبي ..l’entame متاع الكلام هايلة ..
سي قدور : ثانيا ..أنا اليوم قررت اني نزيد ..
حدة : قلتلكمش زيادة ؟
سي قدور : قررت نزيد نحكي معاكم كيما كل مرة ..باش يزيد عندكم الإيمان بالخدمة ..اكثركم بدا معانا مالأول ويعرف الشركة كيما يعرف دارو ..قسمنا الباهي بيناتنا وحسينا ببعضنا كيف واحد منا يتوجع ..اليوم حبيت نشكركم ونقلكم يعطيكم الصحة ويرحم والديكم …
سكتو الناس الكل ..( شكر هاضاكهو ) 
وكمل سي قدور : اليوم حبيت نقول لخالتي خضراء ..انشاء الله مبروك ..
تلتفو الناس الكل لخالتي خضراء وهي باهتة ماهي فاهمة شيء ..عمرها الكل احتفلت مرتين بعيد ميلادها …
خالتي خضراء : واشبيكم ؟ ولاش تباركولي .. تقبلت في المناظرة متاع الديوانة ..
سي قدور : خالتي خضراء …انشاء الله كل عام وإنت حية بألف خير وصحة ..اليوم عيد ميلادك ..
هيا مانطولش عليكم فرحو الناس الكل وهناو بعضهم وباسو خالتي خضراء منا ومنا وكلو القاطو ومالجملة ليامنة لفت مالخبزة زوز مورسوات 
لراجلها المولدي يموت عالشكلاطة …وحدة غنات لخالتي خضراء انزل ياجميل للساحة وتمخطر هنا بالراحة 
…الحاصيلو حتى من شهاب عمل الواجب جبد خيط وركب guirlande حمراء وخضراء في إل chariot باش يحفل الجو..
صحيح في وسط الاحتفالات الخيط عمل masse أما الجماعة عملو جو ..وفي وسط الخوضة سالت اليامنة خالتي خضراء على عمرها قالتلها ماندريش أخيتي ..وقيل قريب نغلق الستين ..علجال سي النوري يفوتني بعشرة سنين قريب يغلق السبعين ..
هيا اقعدو بالسلامة 
..المرة الجاية نحكيولكم كيفاش بدينا ..كيفاش بدات EcoGad 
..منين ، ولوين وصلتنا حلمتنا وجهدنا تعبنا …