هيا السلام بروات .. 
أنا زبير ..ثلاثة وثلاثين سنا بخلاف الجمعة 
. ..مريقل برو ..معرس عندي عام ..مرتي اسمها جميلة شهرت جميلة مايكل جوردن ( ميطرو وتسعين برو وميا وعشرين كيلو كي تبدى صايمة ، وماتوخرهاش لتالي ..البونية بالقبر) ومزال ماعناش صغار ..لواه الزربة برو ..
اليوم gريب نصكر ستة سنين خدمة في EcoGad..نسوق في إل chariot …ياحسرة ..الدنيا لف لف ..كيني البارح في الأيام تgابلت مع سي قدور 
.. عملي ال l’entretien وقالي مرحبا بيك ..خرجت من عندو طمبجت في جميلة ..قلت بيني وبين روحي هاي مفولة ..استكنتى سي زبير وخلي الريح في gفاك ..
انا زبير
..في دنيتي مايgلgني شيء .. ها مالة كيفاه برو ..أما فمة حاجات في حياتي يعملولي النقرص موش نرمال .. مثلا العبد اللي بووجهين والكبار في البريكة ..ونكره اللي يحب يعلم الناس تعيش وهو لابس فرديتين ايمين .. 
بطلت الدراسة برو على بكري ..( ريتو صبعي برو كيفاش أg صر من اندادو …أنا كليتو (
بطلت وgعدت مدة سارح في ملك ربي ..عايش في تونس وعندي في راسي décalage horaire موش نرمال ..عايش في الظل ..بالخلاف ..الناس تفيق وأنا نرgد..نرمال ..صغير حتى كبرت …وماعادش اختي سعاد يفضلها تعطيني المصروف ..وكيف دخلت نخدم في EcoGad ..حسنت خطي وشريت مسطرة ..
نحكيليك على عرسي برو ..والله science fiction ..فيلم بطولة ستيvن سيgال ..تكلف بكلو مليون وميا 
.. وبشهر العسل برو ..والtraiteur فازة gراتوس من عند سي قدور ..عرس في سطح دار جميلة ،أربعة ايام عسل في دار الشباب قربة البحر خطوتين ونرمال …وماركزت في شيء برو ..لاكسكسي لاطاجين لاعوادة لاذهب …حاجة وحدة صباح عرسي مايجيني حد يدق علي يقلي بربي هاك الحسبة زبير ..
اكثر حاجة برو خذات مني وقت واعصاب ..إختيار الشريك المناسب ..مروح نهار ثلاث عشية نلgاها لاحمة في الحومة ..دخلت نضرب على ماياتي 
…حمل الجماعة ريش ..تفضت العركة وهد الحاكم نلقى وجهي للحيط أنا وجميلة ..تلفتلها .. gلتلها العركة بين اشكون واشكون ؟ باش في البحث ماتتلفليش…
تبسمت عجبتني التبسيمة 
gلتلها أنت اشكون ؟ gاتلي أنا جميلة ياخي gلتلها أنا زبير شهر الوحش ..جميلة والوحش .. توخذيني تربحيني ..قاتلي نخمم ..حقك اختي ..عندك ثلاثة ثواني مهلة للتفكير …وفرات صاحبي جمعتين مبعدها هزيتها مقربطة من دار بوها وماعها بونيس اربعة كراسي مصور فيهم بجعة وكوكوت ..يرحمو عم عبد الرحمان بوها ناس طيبة موش نرمال ..قصادري في باب منارة أما رجلة بالضبط ..اسمو عبد الرحمان أما موش ظاهر عليه جملة ..
حللي الباب مزلت داخل في الكولوار gالي زازتك ..هز وانطلق ..دخلت نلقاها مع امها لابسةmike survetement أخضر كباري …وسبيدري abidas ..عينها تشعل بالسعادة .. 
ليلة العرس برو 
..gتلني المصور 
.. عمري ماريت مصور احول برو ..جابو ولد خالتي معز gالي قاريه قراية التصوير وعندو استوديو …ظهر قاري جمعتين حجامة وعندو استوديو سكنى s+1 ..خدم نهار صانع جاء يحصر في الpatte لclient لقى شحمة الوذن في يدو من نهارتها ..الحاصيلو برو تصاور عرسنا الكل روسنا مgصوصة ..gتلو علاه برو gالي نرمال عشيري احسبها فازة artistique والفايدة في الهناء ..
الحاصيلو برو …. بعد بريج البقلاوة وكويس الروزاطة وياسيدي ماحلالي عرسو صفق المدير ونلgى روحي راسي راس الgول مع جميلة ..تقول في الصحراء برو ..تلفتت gالتلي هزني كي بايلي بيك متاع حريم السلطان ..
كيفاه برو ؟ميا وعشرين ميزان الحب بخلاف الروبة والدماق والماكياج 
…والعبد لله سبعين كيلو كي يبدا عندي صرف في مكتوبي نمشي مايل ..تحبني نهزك كي بايلي بيك ..اشبيك ؟
الحبيب قدع وعايش في ال rez de chaussée..واحنا بيت النوم الفوق وبيناتنا دروج ياحب ..وأنا برو وقتها الدروج نشوف فيها الشعانبي ..gاتلي مالة كي ماتنجمش روحك هانا gاعدين نتفرجو في قناة وحدة وعشرين …وعلى كلمة وحدة وعشرين برو …نعمل هكة ……
أه بروات ..ريgي شاح ..يزيكم اليوم ..هيا فنتبرو بالسلامة …تو المرة الجاية نكمللكم الفيلم ..