خالتي خضراء يديها خضراء …اقدم خدامة في Eco Gad ..من نهارنا الأول وهي حاطة يدها معانا ..
خالتي خضراء ..هكة اسمها ..تولدت في الربيع ..وقت اللي نور اللوز ..سمّاوها خضراء يستباختو بيها …كبرت مع أندادها في بقعة يسموها فيض المثنان …جداتها دادة محضية كي تولدت علقتلها شركة مرجان في وسطها قليب سخاب ودعاتلها ..( بري بنيتي يفوح ريتك في الدارين ) ..
وبوها عم الشادلي فلاح على قدو …يخضّر كل عام النصيب اللي كتب …النصيب اللي يعيشهم على قدهم …أما فرحانين ماهمش مخصوصين …وكان كي يحب يغرس ينادي لخضراء تحط يدها ..يقول يديها خضراء ..
ولتوة خالتي خضراء …عايشة على قدها ..أما فرحانة بدنيتها وصغيراتها ومولى بيتها عم النوري ..عساس في شركة خاصة على ملك راجل قاوري اسمو Francois le Petit و tellement ناس ملاح وعامل معاهم المليح ..البعض من خدامتو يتقولو قالو اسلم وشهد عندو مدة وخذا شهادتو من جامع الزيتونة مصحح فيها المفتي بيدو وهاكة علاش يعيطولو محمد الصغير ..
عم النوري مريقل مسوقر يخلص نهار سبعة وعشرين في الشهر وياخو في عيد الصغير المهبة وفي عيد الكبير حق العلوش ويصبو عليه في الكاس ..
خالتي خضراء عالفجاري تقوم تخمل وتقد ..تركب افيم فطور الأولاد والراجل وتقصد ربي ..في الوقت اللي يروح فيه عم النوري ..يتقابلو في الكولوار …يسلمو على بعضهم بالبوس ..وينك ياخضراء وينك سي النوري …بالخلاف عايشين ..اما يتقابلو نهار الراحة ..اللي حرصو باش يقابل بعضو ..يتلمو على الكسكسي والسلاطة الخضراء وكاس التاي الأخضر بالكاكاوية وخالتي خضراء اصيانة في التطييب ..عندها نفس كيما يقولو ..عاد يقسمو اللي كتب ..ويلخصو لبعضهم اللي تعدي عليهم في الجمعة الكل …
هو يحكيلها على سي محمد الصغير وهي تحكيلو على Eco Gad …
هو يحكيلها على صاحبو علي اللي ياخو عليها البوسطة في العسة وهي تحكيلو على الشركة وصاحباتها في الخدمة شايخة متهنية فرحانة ماهيش مخصوصة والخدامة كينهم في عايلة ..صاحباتها ليامنة وفتحية وام الهناء كل وحدة بسرها واقربهم لقلبها خالتي حدة مرا شبابة ، ضامرة وجهها ديم مزين بضحكتها ..وقت الفطور يتلمو …كل كلمة بضحكة …بتنبيرة ..وساعات كان سكتو ومن بعد اطرشقو بالضحك راي خالتي حدة حكاتلهم نكتة خضراء ..لازمنا نبصرو باش يتعدى الوقت ..هكة تقول خالتي حدة ..
هانا حكينا ومزلنا باش نحكيو ..على يومياتنا وهدراتنا على ضحكنا وسيره الصغير والكبير في وسط الشركة ..
…خضراء يديها خضراء وفي Eco Gad تصنع في الخضار ..
هيا اقعدو بالسلامة ..